Երրորդ մասի գետնանցումում կյանքի մի ամբողջ հանրագիտարան կարելի է կազմել․․․
Կից-կից տեղադրված կրպակներում իրենց կյանքն են անցկացնում տարբեր տարիքների անձինք, ովքեր բառացիորեն օրվա հաց են վաստակում ձմեռվա ցրտին և ամառվա տապին․․․
Դա նրանց կյանքն է, նրանց առօրյան, նրանց աշխատանքը, նրանց արդար քրտինքը և նրանց իրականությունը․․․
Կրպակներից մեկում տարատեսակ մանրուքներ է վաճառում մի տատիկ՝ շատ խամրած աչքերով, ծանրացած շարժումներով․․․ Կողքի կրպակի աղջիկն ինձ պատմեց, որ նա 85 տարեկան է և այդ աշխատանքը նրա գոյատևման միակ միջոցն է․․․
Մի անգամ ուշ երեկոյան նրանից նվերի փաթեթավորման թուղթ էի գնում, որի ընթացքում լսեցի, թե ինչ գեղեցիկ գրական հայերենով է խոսում, ինչ լավ բառապաշարով ու ինչ հնչուն առոգանությամբ․․․Այն ընթացքում, երբ նա դանդաղորեն փաթեթավորում էր այդ թուղթը, իմ կողքին հայտնվեց մեկ այլ տատիկ՝ լրիվ սև հագուստով և սև գլխաշորով, շատ կորացած մեջքով և մեծ տոպրակներով․․․ Նա վաճառում էր կապոցներով նանա, ումից ես գնեցի նրա ձեռքին առկա կապոցները հույսով, թե նա կավարտի իր առևտրական օրը և կգնա տուն։ Ավաղ, նա մի փոքր հեռանալուց հետո իր տոպրակից հանեց ևս նույնքան կապոց և շարունակեց իր երթը։ Այդ ընթացքում մյուս տատիկը լուռ թուղթն էր ոլորում, հետո ինձ իր կողմից շնորհակալություն հայտնեց, որ ես գնեցի նանայի այդ կապերը և պատմեց նանա վաճառող տատիկի կյանքը․․․ Վերջինիս տղան բանտում էր, որի երեխաների նկատմամբ խնամքն այս կորացած մեջքով տատիկի վրա էր։ Թե որտեղ էր նրանց մայրը, անհայտ մնաց․․․
Արդեն անհետացած կորացած մեջքով տատիկն իմ հիշողությունից դժվար թե հեռանա, քանի որ հետո դեռ երկար մտածում էի, թե ինչու ավել կապոցներ չեմ գնել․․․
Մի քիչ խորանում ես, և երկու երիտասարդ աղջիկ վաճառում են կոսմետիկ ապրանքներ և անցկացնում են իրենց կյանքի լավագույն տարիներն իրենց հայրենիքի մի անշուք գետնանցումում․․․
Մոտենում ես գետնանցումի ելքին, աստիճանների վրա մի գեր տատիկ ոչ մաքուր շորերով վատ մրգեր ու կանաչեղեն է վաճառում․․․
Նրանից մի փոքր վերև մեկ այլ տղամարդ կիտրոններ է վաճառում․․․
Ամեն ինչ բնականոն է, սովորական ու աչքի չընկնող․․․
Որոշ մարդկանց համար իրենց հոգեբանությունն անհիմն խաթարող երևույթ․․․
Որոշ մարդկանց համար իրենց «բարձր» տեսակը նման երևույթներից հեռու պահելու առիթ․․․
Շատ մարդկանց համար հայացքը թեքելու հիմնավոր պատճառ․․․
Ոմանց համար կյանքին ու աշխարհին հարցեր տալու և իրականության հետ չհաշտվելու ամուր հիմք․․․
Կյանքն այն է, ինչ կա․․․
Կյանքն այն է, ինչ կա 